അടിമ

 

മനുഷ്യന്‍ മൃഗമാണെന്ന് പറയരുത്
കാരണം മൃഗശാലകള്‍ക്ക് മുമ്പ്‌
മനുഷ്യഅടിമശാലകള്‍ ഉണ്ടായിരുന്നു ... 

പ്രവാ-സ്വകാര്യം

   

പ്രവാസിക്ക് പകരം 
 

വീട്ടില്‍ തന്‍റെ പഴയ ചെരിപ്പ്‌ കാവലിരിക്കുന്നു !

അച്ഛന്‍റെ മകന്‍

 

അച്ഛന്‍റെ ചൂണ്ടുവിരല്‍ പിടിച്ചു നടന്ന് വളര്‍ന്ന മകന്‍
അവസാനമായി പിടിച്ചത്‌ മരിച്ച അച്ഛന്‍റെ തള്ളവിരലില്‍...
അവിടെയിപ്പോഴും  മഷിയൂറിക്കിടക്കുന്നു ...

ഉപായം

അച്ഛനും അമ്മയ്ക്കും
വിഷം നല്‍കാന്‍ പാടില്ല ..
അത് പാപമാണ് ..
അത് കൊണ്ട് അവന്‍ പതിവായി
ചിക്കനും മട്ടനും ബീഫും
മധുരപലഹാരങ്ങളും
വാങ്ങിക്കൊടുക്കുന്നു ...
ഇപ്പോള്‍ അതും ഒരു ഉപായമാണല്ലോ...! 

നമ്മള്‍

 


ആദ്യം 'കടവുളേ '...
പിന്നെ 'ഡെവിളേ '....

(നമ്മള്‍ ചെകുത്താന്‍റെ മന്ത്രവാദം തേടിപ്പോകുന്ന
ദൈവവിശ്വാസികള്‍ ) 

ഉപ്പൂപ്പാ ...

ന്റുപ്പൂപ്പാക്ക് ഒരു ച്ചുക്കൂണ്ടാര്‍ന്നില്ല ...
ഉമ്മൂമ്മ പാത്തുമ്മാക്ക് ആടൂണ്ടാര്‍ന്നില്ല ...
എനിക്കോ ഒരു ബാല്യകാലസഖിയുമുണ്ടാര്‍ന്നില്ല ...

വിശ്വാസം

 

മഴക്ക് വേണ്ടി
 പ്രാര്‍ത്ഥിക്കാന്‍ പോയവരാരും
കുടയെടുത്തില്ല ...
വിശ്വാസം ..അതല്ലേ എല്ലാം ..!